Deifi

Da Deifi (oda: Duife, sidboarisch: Teifl oda: Tuifl) (vo griachisch: Διάβολος, Diábolos, weatli „da Durcheinandaweafa“ im Sinn vo „Vawirra, Faktnvadraaha, Valeimda, Chaosstifta“; lateinisch: diabolus, dt.: Teufel) wead in vaschiednan Religiona ois Personifiziarung van Bäsn ogseng. Monchmoi wead aa: Sparifankerl oda Spirifankerl zu eam gsogd.

Im Kristndum is da so gnennde Antikrist, da Wiedasocha vo unsam Heagod, dea wo noch sei'm Rausschmiss aus'm Himmi grod san oagna Vaein afgmochd hod und seitdem sei meglichds duad, um de guadmoanandn Obsichdn van Schepfa grod entgengz'wiakn. Zwecks dem hod a se sein Vaein de Höi, eihgrichdd, wo a de vastoamna Sinda vo da Eadn eikkastld und bis in olle Ewigkeit martan duad.

Obgseng dovo mochd's eam offnboa a Heidngaudi, ob und zua af da Eadn afztaucha, um in olle meglichn Vakloadunga de Leit zan Ibaschreim vo eanare Söin z valeitn, van rechtn Weg obz'bringa oda za schlechte Tatn zan ibaredn. Da Herr Dr. Faust is aus da klassischen Literatua as bekonndasde Opfa, oba a de Sogn- und Mäachnwejd gibd do so oanigs hea, wens um de Umtriab van Deifi geh duad. Trotzdem, dass a ollawei ois a Gengpoi zan Heagod gseng wead: De Literatua stejd an Deifi ned sejtn aa ois a Weakzeig do, des wo da Heagod bloß nuzd dad, um de edelsdn Karaktaziag vo da Menschheit imma wieda z Dog z feadan.